هذي الطريقة جداً سهلة و أحلى شي إنها صحية، نشويها بالفرن و بدون زيت و قلي
نبدأ بسم الله...
في بادية كبيرة نخلط:
6 قطع صدور دجاج مفرومة فرم ناعم
بصلة صغيرة مفرومة فرم ناعم
فصين ثوم مهروسين
نص كوب جبن تشيدر مبشور
بيضة
ملح - فلفل أسود
و عشان نبدأ الشغل بنحتاج 3 صحون عميقة...
واحد نخلط فيه بيضة مع شوية حليب...
و الثاني نحط فيه طحين...
و الثالث نخلط فيه هذي المقادير (بقسماط - ملعقة صغيرة سمسم - رشة بابريكا - ملح - فلفل أسود - ملعقة كبيرة جبن بارميزان مبشور - رشة أوريغانو - و للي يحب الحار ممكن يزيد فلفل أحمر بودرة)
و نجيب صينية فرن و نحط فوقها شبك الشوي و ندهنه بالزيت...
الحين نجي للتشكيل و التجميع
خلطة الدجاج بتكون طرية و تلزق باليد، بس ما عليه حاولوا قد ما تقدرون تشكلونها بشكل طولي، بعدين غمسوها بالطحين و بعده البيض، و في الأخير غطوها تماماً بخلطة البقسماط... و ممكن تستبدلون خلطة البقسماط بالكورن فليكس المجروش...
نصف أصابع الدجاج على الشبك المدهون و نرشها بالزيت رشه خفيفة...
ندخلها الفرن على حرارة 350 فهرنهايت لمدة 35 دقيقة...
و بنسوي معاه تغميسة... طبعاً لكم الحرية في اختيار التغميسة اللي تفضلونها... ممكن تحطون صلصة الرانش، أو صلصة الباربكيو، أو البلو تشيز... اللي تحبون...
أنا حطيت نفس تغميسة رايتشل، كاتشاب و خردل، لكن زدت عليها مايونيز...
في بادية صغيرة، حطوا كمية من الكاتشاب، و فوقه بالنص ارسموا حلقة من الخردل، و فوقه بالنص حطوا المايونيز... بعدين جيبوا عود أسنان و سووا خطوط مثل شبكة العنكبوت...
إن شاء الله تعجبكم و عوافي على قلوبكم
